Die Vet Weet

Dankie Kammakazi vir die Nominazi!  :¬)

Nou ja, waar krap ‘n mens 7 feite oor jouself uit?

1. Word sterk deur olfaktoriese en ouditoriese stimuli beïnvloed.

2. Het 5 jaar in Rhodesia, 21 jaar in Suid-Afrika en Suidwes-Afrika gewoon, en is nou omtrent 21 jaar in Engeland.

3. Ek hou van orde, ritme, simmetrie en palindrome.

4. Is oor ‘n paar dae reeds 25 jaar getroud met dieselfde mevrou Gidi.

5. Gidivet was 30 jaar terug in Matriek, en was bekend as Gatiep.

6. Het 10 jaar terug kortstondig ‘n sixpack gehad, en het ‘n foto om dit te bewys. En nee, dit was nie die soort wat ‘n mens in die yskas bêre nie. 

7. Is baie lief vir vegetariese geregte, met ‘n lekker stukkie vleis daarby.

Ek is bietjie uit voeling met die blogs, so ek weet nie of hierdie volgende mense al reeds genomineer is nie:

Ek nomineer:

1. Joanna

2. Darlingdee

3. Ezile

4. Tina

5. Foxy

Advertisements

SoundCloud

Ek het onlangs eers die wonders van SoundCloud ontdek. Dit is oorspronklik in 2007 begin as ‘n platvorm waardeur kunstenaars hulle musiek met mekaar kon deel, maar deesdae kan dit gebruik word om musiek- en ander opnames wêreldwyd te versprei. 

Roy Stannard is ‘n baie talentvolle vriend van my wat in die advertensiewese werk. Onder ander is hy die mede-stigter van Splash FM, ‘n plaaslike radiostasie in ons buurdorp, Worthing. Hy het onlangs geblog oor “The tracks that changed my life.”

In hierdie artikel is daar ‘n skakel wat jou na sy podcast neem, waar jy na sy musiekprogram kan luister. Roy het vir jare as ‘n omroeper gewerk by sy radiostasie, en sy musiekkennis is ensiklopedies. 

In elk geval, dis hoe ek kennis gemaak het met SoundCloud. As jy jou musiek of selfs jou podcasts met die mensdom wil deel is dit baie baie maklik om hierdie medium te gebruik. Ek het die SoundCloud app vir Android op my foon afgelaai en die opname sommer direk op die foon opgeneem en opgelaai. Natuurlik is dit ook vir die iPhone beskikbaar.

As voorbeeld plaas ek eerstens Roy se baie professionele radioprogram, en dis nogal die moeite werd om heeltemal deur te luister. Daarna het ek sommer een van my gunsteling gedigte opgeneem. Vir die van julle wat my kentekens hier regs raakgelees het sal dit ‘n ou bekende wees.

http://player.soundcloud.com/player.swf?url=http%3A%2F%2Fapi.soundcloud.com%2Ftracks%2F16952491
Roy Stannard – Memory Box by roystannard

http://player.soundcloud.com/player.swf?url=http%3A%2F%2Fapi.soundcloud.com%2Ftracks%2F17454655
Stil aand, deur NP van Wyk Louw by gidivet

Net vir ingeval die html skakels nie werk nie pos ek die direkte paadjies hier onder:

http://soundcloud.com/roystannard/roy-stannard-memory-box

http://soundcloud.com/gidivet/stil-aand-deur-np-van-wyk-louw

Klankpaljas

In die jare sewentig en tagtig was daar ‘n program op die Afrikaanse diens van die SAUK: Klankpaljas.

Ek moes reeds as kind daarna geluister het, en mettertyd ook as student.

Hier in ons huis is nog ‘n kasset van een van daardie programme, die een waar ek die eerste keer die gedig “Stil aand” deur NP van Wyk Louw gehoor het.

Gaan lees gerus ook hier, waar Kleinboer ook hieroor geskryf het. Wat ‘n skade dat hierdie opnames blykbaar verlore is.

Ek so baie graag daarvan wou bekom as iemand ook opnames daarvan gemaak het.

Ek het vanaand weer na die ou kasset geluister. Agterop is ‘n UNISA Teologiese Etieklesing uit 1994. Dis toe mev Gidi nog probeer teologie swot het. Hier in Engeland het dit onmoontlik geword om by te bly, want die boeke uit Suid-Afrika het heeltemal te laat hier aangekom. Die dat ons toe maar sommer die agterkant van die kasset gebruik het om ‘n opname van Klankpaljas genaamd “Winter” op te neem. Die een vers meer atmosferies as die volgende, die musiek wat meer en meer trekkerig word soos die kasset verder aanrol.

Miskien is dit tyd om bietjie self ‘n digbundel nader te sleep en weer vir mekaar gedigte voor te lees, soos ons soms gemaak het toe ons die eerste keer hier in Engeland aangekom het, presies 21 jaar gelede.

Maar waar is my Groot Verseboek? Iewers in ‘n boks op die solder. Wie weet, dalk as ons nou weer trek sal daar ‘n plekkie wees vir ‘n boekrak, waar sommige van die ou boeke weer ‘n regmatige plekkie kan kry.