Cavtat en Dubrovnik

Ek het ‘n heerlike paar dae in Cavtat en Dubrovnik spandeer terwyl ons die katkongres bygewoon het. Oor die details mag ek dalk later ietsie sê. Daar was baie ou bekendes en ‘n hele paar nuwes om mee te kuier, en ons het elke aand gaan uiteet. Op die Saterdagmiddag het ek saam met die Britte en Suid-Afrikaners by die Irish Pub die eerste toetswedstryd tussen die Springbokke en Leeus gaan kyk. Dit lyk my die Ierse pubs is nou orals. En die bier in Kroasië is ook glad nie te sleg nie.

Ek het voorsiening gemaak en sommer ‘n 4Gb SD kaart in my kamera gelaai. Na minder as ‘n week is daar meer as 300 foto’s. Hier het ek sommer net ‘n paar gegryp om ‘n smakie te kry van die plek:

Cavtat

Cavtat

Dubrovnik

Bootrit tussen Cavtat en Dubrovnik

Ierse pub in Dubrovnik – heel “toevallig” was ons daar om die Bokke te sien wen.

Dubrovnik bied fassinerende detail. Dis nie verniet ‘n Unesco World Heritage stad nie.

Dubrovnik Ou Stad – marmer is orals.

Die storie van Dubrovnik is baie interessant. Deur die eeue het inwoners van hierdie stad hulle vryheid hoog geag en probeer om neutraal te bly. Hulle het byvoorbeeld suksesvolle handelsooreenkomste met sowel Venesië as die Ottomaanse Ryk gehad en baie welvarend geword.

Hierdie was eintlik ‘n blitsbesoek, en eendag hoop ek om met my gesin terug te keer en langer te vertoef.

Sien jou daar!